صباحك كمنجة
محمد ضباشه

صباحك كمنجة وقشطة وحليب
وصرخة غلابة وقهرة حبيب
وكرسى ما راسي فى جوف النهار
بينحت عظامنا بكف الغريب
ومركب تكركب فى بحر الدموع
وزفة بكفة بتسرق فى جوع
ومولد وصاحبه مفارق حياة
بيغلى لحومنا فصارت بخار
صباحك حمارنا ينهق ما فيش
وشايل ومايل مالاقى الدشيش
يهد الزريبة ويرسم أفيش
لكل البهايم فى حفلة فيشار
صباحك مخاوى بعطر البخور
وصك البلاوى بيعتم فى نور
وغفلة سكوتنا تدق الطبول
تصحى نهارك يشوف الدمار
صباحك فى قلبى منور حياة
وداخل حيطانى مشعلل فى نار
صباحك موصي يدين النجاة
تساعد سكوتنا فى هدم الفنار
واقابلك فى نومه وحلم جميل
والاقى الحقيقة فى قالب هزار