خلص الكلام

أيمن البكرى

أنا قررت النهارده
إني مش هعاتبك
ولا هحن ليكي تاني
ولا هيوحشني قلبك
ولا عايز أفتكر أي لحظه
كنت فيها جنبك
نسيتي لما كنتي بتقوليلي
إنك بتفهميني من عنيا
ما صدقتي أى غلطه
علشان تنهي إل بينا
إيه يعني كنت بتعصب شويه
بس كنت برجع أتأسفلك وبهدي
كام مره كسفتيني
وأنا جأى أعتذرلك
وف إيدي وردة
كان نفسي ألاقي فيكي إنسانه
تحبنى ذى ما أنا
مش غاويه بس تبين عيوبي
كان نفسي ألاقي فيكي بنت حنينه
بقيتي عامله زي ورده دبلانه
وشمس مستنيه لحظة غروبي

أنا عايز أقولك إن بعدك
مهدنيش ولا ملياني الألام
ياما كنت بموت عليكي
وملقتش منك أي إهتمام
ياما كنت ببعتلك رسايل
وكان دايماً ردك
هكلمك وقت تاني سلام
عايز أقولك إني متكسرتش
أنا عادي كويس وتمام
ولا بسهر طول الليل
ولا واقفه معايا الايام
ومش هحكي عنك لحد
أنا نسيتك
المره دي نسيتك بجد
كل لحظه كل كلمه كل وعد
كل الرسايل كل الصور كل الاحلام
مسحتك من حياتى
وسنينك بعتها
إنت, ورقه في دفتر ذكرياتي
ب إيدي قطعتها
ولو فاكره إني بعدك مش بنام
ومش لاقي من غيرك أمان
ومستني رساله منك
لا صدقيني داه كان زمان
إنت, قصه وإنتهت
ومعاكي خلص الكلام