………اكيد هاتطير…..

ولو روحك بتتسرسب
على السكه
ولو بكره فضل منه
يادوب حته
ولو بحر الامل واسع
اكيد هتعدى م الشده
مادام الصبح بيعدى
وقلبك لسه متوضى
وعالقبله
هايجى الفجر ويسلم
خيطان الضى بالفتله
ومهما الليل فتح كفه
وتعبوا الخلق من تفه
اكيد هتولع القناديل
ومهما الحلم كان قاسى
مالوهش بديل
ولو جواك براح ابدر
غناوى كتير
وعيش الدنيا واتعلم
اكيد هاتطير
ولو حزنك مسك روحك
هتفضل جوا وفى سجنك
سنين ياما
فسيب الفرح يدخلك
ويغسلك جراح العمر
ويرسملك طريق
تمشيه
ودارى الدمع فى الضحكه
وكمل اخر الرحله
وعيش لو إيه
وعافر مهما كان وجعك
وهات امانيك
هايجى الصبح
وفى كفه
بقيت غناويك
وخلى الشمس تدخلك
من الشبابيك
ولو سجنك حيطان
كلمه هتوصل بيك …………..

اشرف الشناوى
شاعر عاميه
المنصوره
البرامون