توأم روحي

ومين في الدنيا زي اختي تملي قلبها عليا

روحي متعلقه بيها وساكنه في قلبي وعنيا

معايا في كل اوقاتي واكتر حد يحس بيا

دي سري وبيتي ومسكني وعلي شموعي مداريه

دي هي الفرحه والضحكه وهي الدنيا والناس

دي توأم روحي وحبيبتي أغلي من الدهب والماس

ربي يديم لي وجودها دي هي الثروه والميراث

اجمل هديه من الرحمن متشاله دايما فوق الراس

وجودها جمبي يقويني ويحميني من الاحزان

دي هي النور والبهجه ولقلبي وروحي امان

دي عشرة عمري وسنيني ورفيقتي في كل زمان

حتي لو بعيد عني روحها ونس في كل مكان

ومهما بعدتنا المسافات قلوبنا حاسه ببعضها

اختي القريبه ولو بعيده اختي الجميله بطبعها

ومهما يكون ليا حبايب محدش عندي زيها

أفرح لو اشوفها فرحانه ولو تزعل أزعل قبلها

حضنها هو الامان وجودها جمبي يمحي الهموم

من غيرها بكون زي طير من الجناح محروم

اشوفها أطير وأفرح وعايزة اوصل للنجوم

ربي يديم لي وجودك وضحكتك دايما تدوم

زكيه فيصل