الواقع المرير يخلق أحياناً إنساناً ممزوج بالتعب مع الكثير من الصبر ليتحول إلى جوهرة دهبية تزداد لمعاناً كلما حُرقت هو الذي جعل للجسد حكاية و للموضة زمان غير نهائي بتوقيت فكره الإبداعي المنسوب للحرير تارةً و لخيوط الدهب تارةً أخرى بهذه الكلمات بدأ لقاء مصمم الأزياء عبد الفتاح في برنامج #مبدع_ولكن؟!

مَن هو عبد الفتاح وكيف يصف لنا نفسه؟

عبد الفتاح شخص متل اي شب سوري فقد كل مقومات الحياة ببلدو وأجبرته الظروف على السفر للبحث عن فرصة أفضل ومستقبل متل اي شب مابيتمنى

لماذا مجال التصميم دون غيره ؟

التصميم مجال ماكان ببالي لكن بالحياة اي شخص مسير ومخير
كان بنفسي كمل دراستي وادرس طب بشري لكن مشيئة ربنا انو اترك الدراسة وسافر وفوت بمجال التصميم

دراسة عبد وعلاقتها في مجال عمله؟

الدراسة هي عبارة عن شهادة فقط مو مقياس للفن والعمل في كتير دكاترة واساتذة دارسين لكن الخبرة بالمجال هي اهم شي متل انك تكون استاذ او دكتور بجامعة بس ماتقدر توصل فكرة للطلاب
كمان التصميم نفس الترتيب انت مصمم لكن ماعم تابدع بالقماش
القماش بيحكي والدليل على هالشي لما تسمع آراء الناس وتشوفهن كيف مبسوطين بالشي يلي اختاروه

الفِكر التصميمي و تأثيره على نجاح التصميم؟

الفكر التصميمي جدا مهم مافيني اعمل أي افكار ببالي ما بتتناسب مع اذواق الناس لازم تكون الافكار متقاربة من الموضة من المحيط يلي المصمم موجود فيه
اكيد مافيني اليوم اشتغل فستان كشف سبور ومحيطي اعراس مختلطة ومحجبات
متل لما شخص ينزل يبيع روايات بسوق البسة الرواية حتفقد قيمتها وتتكلل بالفشل طبعاً

الجسد والتصميم مصطلحان في غاية الأهمية كيف يتعامل معهم عبد؟

الجسد هو اهم عنصر بالتصميم متل الشجر والثمار
شجرة حلوة بس ورقها يابس وما فيها اهتمام
نفس الشيء القماش هو كسوة قيمة وبتعطي قيمة للجسد

نرى بإن مصمم الأزياء يجب أن يكن على دراية بالبشرة وما يناسبها ما رأيك ؟

المصمم لازم يكون عندو خلفية واسعه لكل شيء
البشرة والمكياج واللوك الناعم الحلو اهم من التصميم نفسو
الناس الها الخارج وممكن تصميم مو جيد يروح جمال الشخص بنفس الوقت يلي بكون فيه سوء الاهتمام بالبشرة والميك اب بياثر على موديل التصميم ونوعه

ما نوع الأقمشة المفضلة لدى عبد ولماذا؟

القماش المفضل ويلي بعتبرو مهم جدا وبقمة الاكابرية الشك اليدوي المعروف بالهاند ميد هو شغل ناعم وتقيل وجدا مناسب للانثى ومعظم الفنانات بيختاروا هاد القماش لانو بدون شي بيحكي وبيلفت النظر بجماله

طول الشعر و حتى لونه هل يؤثر على الإطلالة نتكلم عن جانب اللباس؟

طول الشعر هو شيء من طبيعة الشخص مافينا نتحكم فيه لهيك قلت انو الاهتمام بالميك اب والبشرة مهم واختيار التصميم الانسب هو الاختيار الصح اكتر من الموديل المشهور طبعاً

مَن هي الفنانة التي إطلالتها مميزة بنظر عبد ؟

نسرين طافش
بعتبر الفنانة نسرين شخص متألق وأنيق باختيارها لفساتين السهرة والمهرجانات
اما بالنسبة كفنانات مصريات انا شتغلت لكذا فنانة طبعا في اختلاف كبير بين الذوق السوري والمصري

ما هو جديد عبد و ماذا ينتظر جمهوره؟

باذن الله القادم شيء جميل جدا وما رح احكي عنو خليه مفاجأة

الشباب العربي اليوم ماذا يفتقد؟

الشباب بيفتقد شبابه !
صراحة برأيي نحنا شباب ماعشنا شبابنا صح لازم الشخص يطمح ويسعى بس برأيي الشباب اهم فترة بحياتنا.
ولازم نعيشها لان ماحتتكرر طبعا بظل وجود مقومات الحياة

عبد مبدع ومتألق لكن؟

عبد مبدع لكن اكيد مر بصعوبات وقدر يتخطاها بفضل الله ولحد الآن بيكتشف شغلات ماكان بيعرفها وهالشي ابدا مو غلط
بالعكس نحنا كل سنة عم نتغير بكلشي
ولازم نواكب الوقت يلي نحنا فيه

 

 

قام في الحوار  الصحفي : محمد وسوف/ سوريا