وضع مأساوي
…………………………….
يا بلدي حن علي ولا تقسى كتير
عالغربه لا تساعدني رح جن وطير
بوسطك عايش بالقله معتر تعتير
دخلك يا رب عطينا لو أمل صغير
…………………
الدولار كلمالو بيغلا ومافي بنزين
الليره السوريه صارت حقا قرشين
والسياره وقفتا إلها سنتين
وعم إتمشى عا شغلي ويا رب تعين
…………………
وعالبطاقه الذكيه مافي مازوت
ومن برداتي يا خيي شويه وبموت
قاعد وزامم حالي متل الكتكوت
وحاسس تلفت أعصابي ومخنوق الصوت
…………………..
ومصروف بيتي يا ويلي بدو ملايين
والسرقه عنا كترت والنصابين
والكهربا زيارتها كل يوم ساعتين
وحلا انكنك بتحلا يا نور العين
…………………
الراتب ما عم بيكفي وولادي صغار
لا في سمنه ولا زيت ولا في سكر
والخضرا صاير سعرا ولعان بنار
وكلمالا الليره عنا عم بتنهار
…………………
حتى الدوا ببلدنا صاير مفقود
والطبابه غليانه ومافي مردود
والموظف لمعتر دخله محدود
دخلك يا خيي قلي شو اللي موجود
………………………………………
ملك محمود الأصفر