بداية النهاية
محمد ضباشه

1- الغلابة

قلت الغلابة وطن
قالوا ما يلزمناش
اللي زمانهم وطن
فوق الرصيف ملقاش
لقمة تبل الجوف
أو ليل ما يتهناش
فابعد بقلمك وطن
غور به متقرفناش

2- العدل

العدل على المصطبة
والشمس محرومة
من حضن فيه طبطبة
أو إبرة ملضومة
تخيط اللى انجرح
يلقى لهواه قومة
نشم ريح عدلها
اللي زمانه ما جاش

3- صراخ

صوت الصراخ فى البيوت
إعلان بداية موت
لا يوم سقاه المطر
ينبت فى جوفه القوت
يطفي لهيب الصراخ
وتتولد بسمة
على شفاه أيقنت
أنه ما يعرفناش

4- جباية

كرسي الجباية أمر
ما يساوي بين الروس
ونفوس ما لاقية الطبق
فيه م المحبة غموس
طمعان يبيع الهوي
والتختة ويا الدوى
ويعلق اللى انكوى
من جيب مافيه مليم
لحد ما يفرفروا
يلقوا ربيعها طناش

5- هدوء

هدوء ما قبل الغضب
يشبه كحال اليوم
لا يفيد معاه العتب
يدفن ف قلبه البوم
اللي سرح فى الدم
وما رحم مظلوم
ينادى يا ظلمهم
قطر الوجع قشاش

6- دامت لمين

دامت لمين يا جبل
لما هتفتح لك
كل بيبان حضنها
ترقص وتقلع لك
تنهش فى ليل لحمها
فاكر هتتباع لك
فرعون بجهله غرق
لما الخبل صابه
ما راعى يوم ربنا
لا ف ناس ولا نابه
ولما آن الآوان
جاب الزمن قاعة
ساعتها بس أفتكر
أنه معانا ضيف
وساب ديول هَمُّهَا
تلهفنا ما تسبناش