😓
أنا الشارع .. و أنا الشارع
و كلي مآسي و مواجع
زرعتوا ف كل خطوة مطب
كلابكم ليه بتتصارع
على صوتي .. على موتي ؛
عجل مجنون بيتسارع
و مات إحساسي
و مين راسي
حفر و تراب على عيوني
و فوق راسي .. يزيد الدب
و لا مرة سألتوني ؛
بترفض ايه ؟!
و ايه بتحب !!
تدوسني جزمكم القاسية
حوافر من حديد .. ناسية ؛
جسد تحتيها بينازع
و من غير ذنب
م انا الواقع
ما بين سرقة .. و سندان نهب
فضايح ياما م الحِرقة ،
و لا بتتلم
و لا الراعي .. ف يوم اهتم
و لمّا صرخت بالشكوى
عمل روحه .. مهوش سامع
و انا صابر
حَمول زي الجمل … بجتر
لكن قادر … فلا تغتر
أنا البحر يبان هادي ،
ف لحظة يثور بموج هادر
و فرق كبير أوي شاسع
ما بين حلمي ؛ .. و أكون راكع
عشان قائد ..
لا يمكن يوم أعيش تابع
ما يعجبنيش كلام مايع
م انا الراضع حليب الأم
و انا الدافع ضريبة الدم
و أنا الصانع و انا الزراع
و انا اللمة
و انا القداس و انا الجامع
و انا اللي … بئن
لـ إني حالي ف النازل
و رغم إني ما بتنازل
منيش طالع
و انا الضايع
ما بين الماضي و مضارع
و بين الأمر
و م الأول .. و ف التالي
و للتاسع
أنا النازف بطول العمر
عشان شاري و مش بايع
و لو مرة عليكو خرجت
منيش راجع ..
سوي بشرعي الل أنا شارع
و أنا الشارع
أنا …….. الشارع

#ashraf_shabana
إعادة نشر