صحيفة نحو الشروق
(شمسة ضاحكة ف وقت باكي)
مش باقيلك الا لحظة
والخروج ما هوش أمان
أي ترس ف عربة بِيقْدَم
والموديل تمنه فيه
اللي قاعد فوق ضفاف
واللي قاعد ع الرفوف
واللي قاعد بين ضروس
السنين البيصة باحلم
أو سنين قالوا عنها
بالعجاف
خط خطك مستقيم
أو خطوط مكسورة زي
اللي خارجة
بين زجاج أو مية مالحة
من يومين كان ضل ليل
والنهارده الضل باكبر
بِفْرش الكون كملاية لف
قلب بيعتم ومغرم
إنه يا خد
ما يدي ابدا
وقلب كاالبنور بيعشق
شمسة ضاحكة ف وقت باكي
إلبس الأوهام بيجامة
أو بدلة قمرة
ف وش كاكي
المحاولة ازاي تكون
ف كون بيضرب
اللي ساكن
واللي راكن
والمحاكي
ميل شوية وبث فيضك
خلِّي بيضك
كسر فيه
البيادة والبريه
وقهوة سادة
وحرف شارد كالخروف
لما يتقدم ضحية
وحرف مية تحت تبن
شوف خروج سفر الخروج
المروج مليانة نخل
وطير بيترنم لترجع
له وليفته
الضجيج ساعات بيِحيِ
َوتارات بيمنع صوت ليوصل
للي غايب خلف شجرة.
جمرة ف الإيد الأبية
والغبية طول وعرض
عايشة دنيا بدون نوافل
أو تهجد
نزوة رايحة ونزوة جاية.
فرض فرض
جه ميعادك وانت نايم
وانت قايم
فين دوسيهك
أي قاضي له شهادة
أو ادلة
أو اعتراف
السجاف بيغطي دوخة
او وقاية م الرعود
عود ف عود يبقى حصيرة
والفطيرة ناقصة سكر
إنت خطيت الحكاوي
والمقدر
شفرة منه تفك فيها
تلقى شفرة بدون حلول
لو هاتخرج.
اختم المظروف بنجمة
ومركية رافعة الصواري
وشق كالضوء العواتم
مرة تتسلق كشاعر
ومرة تتخلق كحاتم
فيك نوادر زي أشعب
فيك غدائر
زي لقمان لما يهتف
أو منابر بين شفايف
عض فيها عقل أكثم
منبعك زي مصبك
الخروج آمن لبكرة
وأي فكرة تربي فيها
يوم هاتكبر زي كلمة ف سطر شعري
أو حدث ف رواية ناضجة
الشاعر وحيد راغب
المحرر الصحفي: أساهي فريد
المحرر الصحفي: بسام أحمد العبدالله
المراسل الصحفي: محمد وسوف
