مانيش شيخة الشيوخ
ومانيش شاعرة زماني

و ماشي طبعي نفوخ
عالتواضع بابا رباني

كي نشوف العوج ندوخ
ونكتب وينطق لساني

مالمنكر ڨلبي عاد منفوخ
ويتكوى وينزف دخلاني

شبابنا كي لخروف المسلوخ
راه عايش في عالم ثاني

يكمي كوكايين وصاروخ
ويولي زومبي في ثواني

ينسي في روحو ويدوخ
ويطير بلا جنحين زهواني

هاك هاك جبدة تمتع وفوخ
وفي رمشة تبعت شيطاني

وعدت كون مانشمش اروح
نكذب ونضرب ونسرق عيناني

تظلام عليا وبالعرڨ مبخوخ
ونرجف ونتوجع ياويلي ونعاني

واش داني تبعت عالم منفوخ
بالوهم والوجيعة زاد عياني

خلاني نكثر ونزيد فيه ندوخ
ومالقيتش شكون لي عزاني

روحي بشوية بشوية تروح
ودعوات ميمتي حياتني

تفكرت ڨلبها كيفاه مجروح
وبابا كون راجل بيها وصاني

استغفرت ربي مالك الروح
واستعنت بالصلاة وقرآني

بوترعة أمينة
#لاللمخدرات