صحيفة نحو الشروق
– زجلية تحت عنوان :
غزالة***
غزالة…
منكادة ي لالا مسرارة
عيونك تشع بلار
زين ؤلحشمة ؤ تيقار
سيمفونية الكمان والقيثارة
نوارة
فتحت في اعماقي عشق وهيام
شغلت بالي ؤ م قلن حرام
زندت شواقي وحشة ؤنارا
نظراتك ب حبال لغرام ربطتني
ؤ بين الحس والقلب صلبتني
كان ضوء الكَمرة ساهر
وعبق الياسمين شاهد والحبارة
زلال لعيون صغا للْغا لهوى ولغرام
نرجس ضفافها ؤ ترانيم لحمام
زادوا لظاي ؤمن كاس لحب سقاوني تارة
ؤ تارة ثملت بهمسك
ؤ وخا تجرفني مواجك…
ماشي فيك خسارة
غزالة نت بلارة
على وجناتك زهر الليمون
فاض الحرف ؤساح المكنون
كان مرسالو بيان واستعارة
كلشي فيك كامل مكمول
ثْبات ؤلوفا ؤ انتهى القول
ؤضوك زاد لهلال نور ؤبشارة
غزالة
***الزجال والشاعر:أحمد الكندودي ***المغرب***
المحرر الصحفي: أساهي فريد
