.
أنا جاي في ذكراك اسألك
هو انت ليه بالشكل دا ..
زي المَلَك
مين ف الشهامة و الكرامة يعدلك
يللي الشموخ ..
كانت حروفه تمثلك
من طمي نيل يابن الأصيل ؛
كانت عجينة صلصلك
يا صلب زي أساس حديد
ف ترابنا شق و أصَّلك

كنت الزعيم
اللي ف أوعرها طريق
بينا سلك
و لوحدك اشتلت الهموم
و حملت ضعف تحملك
وقت الشِدد .. فيك المدد
و للضعيف كنت السند
ما أعدلك
و الشعب كان عندك سواء
و العدل ضله مظللك

الكل كان حواليك يدور
م انت الل نور .. و انت الفلك
قلبك و كان مليان بمصر
الل انت عشت في قلبها
لسه نداها بيوصلك ؛
قوم يا جمال
شوف الوطن بعدك هلك
يا حلم مدفون ف التراب
خنقوه عصابة بالخراب
و الليل حلك

لازم ح ييجي اليوم
الشعب فيه يستقبلك
و بكل أطيافه و طوايفه
بالورود .. هيكللك
و يفوت على النيل و النخيل
ع السمسمية … يغني لك
و يفوت على مكن النسيج
يرسمله صورتك .. يغزلك
و يمر ع المقطوع وراك
بيه بيوصلك

يابو الغلابة الطيبين
فاض الحنين من منهلك
د ما عادش باقيلنا أمل
غير حد ييجي يكملك
يا اللي انت منقوش ف القلوب ..
قبل التاريخ م يسجلك

#لطفي_و_شبانه