النفوس
النفوس مش صافيه
وخلق مش سالكه ولئيمه
عيش وملح وطفح سم
ومش بتتمر الجميله
معرفتهم حرق دم
وتسعيرتهم مالها قيمه
بحقد غل بتستحل
بكل حجه وكل حيله
بذمه طفش وقلة أصل
ونيه سودا مش سليمه
ناس تشيلهم ويدوسوك
ياكلو عيشك ويخونوك
وإن طالوك ما حد شافهم
ياكلو لحمك ويسيبوك
في المصالح يبقو بلسم
ماسك وش بيلعبوك
تمشي خطوه تدي ضهرك
يستحلوا ويطعنوك
وفي قلوبهم طينه منك
و إنت أبيض ما يشوفوك
واللي فيهم شيء قاتلهم
حقد غل بيكرهوك
وإنت طيب ليه يا طيب
دول عقارب لو طالوك
كلو عامل انه جنبك
وإنه مخلص ليك ووافي
وكل واحد حلمو منك
ياكلولحمك وإنت صاحي
يضحكوا لك ضحكه صفرا
ويبانوا لك بحر صافي
واللي متخبي في قلوبهم
بان في بحر الشده طافي
ويحسدوك على النعمه في ايدك
حقد غل بيكرهوك
دي النفوس مش صافيه
وخلق مش سالكه ولئيمه. …
علي دياب محمد. . عاميه مصريه