اللوحة الأخيرة
٠٠٠٠٠٠٠٠٠٠
الغيمة نعسانه ف حضن الصحرا
والخيمة دبلانة من جحد الصخرة
والتوها والغيرة وجع الحيرة
ضيوف اللوحة الأخيرة
اللوحة الأخيرة
و بلاش تكمل مع حد
مابتحسهوش مابتحبهوش بجد
حد باني بينك وبينه الف سد وسد
حد اناني هو وسنينه ل ابعد حد
وان سالته عن نبض قلبك وحنينه
يتوه ويبعد مع غموض الرد
كمل مع الروح الجميله
حتى ف الأوهام حتى ف الأحلام
وابعد عن كلام الآلام وبلاش ترد
علي المشاعر العليلة
وارسم ملامحك ف اللوحة الأخيرة
اللوحة الأخيرة
هو مبدع اول دفعته ف الفنون الجميلة
وأول يناير يوم ميلاد غربته ف الدنيا البخيلة
هو عاجز وحاسس ب وحدته وقهرته
قدام ريشته والوانه واحزانه وفكرته
يرسم ملامح حبيبته اللي خذلته
ولا يرسم أحداث العالم وكسرتة
المبدع ف حيرة يرسم ايه ايه
ف اللوحة الأخيرة
يرسم الشعوب اللي عايشة سنين الغروب
ولا يرسم ظلم الصهاينة مجرمين الحروب
ولا يرسم دق قلبه التايه ف بلاد المحبوب
ولا يرسم الحرمان والأحزان والخاطر المغلوب
المبدع ف حيرة يرسم ايه ايه ايه
ف اللوحة الأخيرة
قلبي ياصحراوي ليه ديما غاوي
صخور الجبال تبكي حس الغناوي
وديما رحال ف روحها طيب ومين يداوي
قلبي ياصحراوي بلاش ترسمها ف الحكاوي
ابعد عن الحنين وشوق السنين والحيرة
ارسم ملامح اول لحظة ف ميلاد الروح
ارسم ملامح الود والحب وجمال البوح
واهرب اهرب اهرب من اللحظة الأخيرة
ف اللوحة الأخيرة
كلمات على عبدالرحيم محمد