……..احضن قلبك دفيه…….

حبش بايديك
عالفرحه اللى فى قلبك
لاتطير
رمم روحك جواك
حاول تطلع
من حزنك باقل خساير
وارسم على وش الليل
صبحك
واحضن قلبك دفيه
وان قطر الافراح عدا
نط بسرعه اركب فيه
وارمى الاحزان
على اى رصيف
واضحك لو حتى
مفيش حته فى قلبك
فاضيه ..عيش
وأحلم لو حتى
الاحلام كرهاك
تبت بايديك واسنانك
فى احبال الامل الدايبه
وافرش امانيك ادامك
اوعى الموج
ياخدك ويسيبك
فى البحر اللى
مالوش شط
او حزنك يرميك
جوا الزنزانه
ويسيبك ملط
عافر يمكن ترجع وتطير
وتتوه وسط العصافير
دا الليل لو نصب السيرك
ودق المسامير
هتخش عليك العفاريت
وتشقلب كل الحواديت
وتشدك من رمش
عينيك
وتبعتر روحك حواليك
اوعى تفرط
فى الصبح ان طل
او تفضل عايش
فى الضل
ان مات الحلم
فى قلبك هاتوه
وتعيش الباقى فى عمرك
مشبوه ………….

اشرف الشناوى
شاعر عاميه
المنصوره
البرامون