أشواق
محمد ضباشه

هاتولى من القمر حِتَّه
تنور قلبى لو ليلة
وتفتح للقلوب سكة
ألاقى الحضن ضليلة
يدفينى …. يعديني
أنا وروحي وشوق أمسي
لزهرة فل تسقيني
رحيق الحب بالكيلة
واكون شاهد على نورها
تاخدها عيونى تبدرها
جناين عشق للعشاق
ودار فيها الحنان ترياق
وشمس نهار ما بتغيب
وبتطيب أنين الداء
تكون واقفة ورا مني
تزيح سيل الهلع عني
برمش الحب تحضني
ما ألقى حضنها أنواء
تزوق لى النهار جنة
أعيش بالحب واتهنى
وتعجن لى النسيم حنة
على خدودها جداول ماء
ولا تفارق ولا تسبني
أداوى الجرح بالأشواق
واقول يارب فين هِيَّا
كفاية تعبت كتر زواق

من ديوان بالعامي الفصيح قيد النشر