ساعه وحشه:بقلم الشاعره :زهراء جبار

ساعه وحشه
و شایله اذنوبي اعله متني
و دربي نار

يا جدم ينشال مني اتطيح چم تفاحة آدم

چم هوا متمكيج ابعين الحرام

چم گصیبه الرخصتها و ضیعت بیها السلام

چم غراب الکبريته و باگ حلقة چم عرس

و چم خریف الضیّفیته و کاتل اشما ینغرس

چم دلو نزلته بیر
یفضح احچایت ستر

بیدي يا ما هدّمت حلم الیتامه من أجل عشبت رصیف
الفیّضت بی مای الله بچله زرگه ابلا دفو
عینی وکحه و رافگت نیت الخریف

ساعه وحشه والعطش شوّفنی مای
وصحره خشنه و گمت أرکض
و السلاسل صارخه و ترکض ورای
والذنوب الحدّبة وگفت گفای

وین ما اوصل سراب
هاویه و شوهت سقر ويل و عذاب

و اوگعت

اوگعت والگاع شربتنی حمیم
و وگعن اذنوبی نفط فوگ الحطب
طیحة المنجل علی ارگاب الگصب
و صوت مالک یرعد اباذنی جمر

بین نَزلَت مقعمه و نار و سعیر
دنگت واعيوني مطرت صارخه و صحت استجير
وبين غربت گاع لو وحشت ضمیر
مرت بعینی عبایة و طشت ادروبي امان
بیها اشم دخان باب المحترگ مکسور بي ضلع الحنان
الزمتها و سافرت بکتارها النص الجنان

#زهراء_جبار_بن_يباره

Related Posts

أجنحة منكسرة للشاعرة المغربية خنساء ماجدي

أجنحة منكسرة. لا تسألوني لماذا أغيبقد أشرد في ملكوت اللهأغرق في دوامة الحيرةوأتيه في صحاري الإحباط.أضيع من حر الشكوىولا تسقيني بنات البحر.هذا العالم لا يسعني …ولا يسع الهاربين من جزره…

وحدتي بألف خير بقلم الشاعرة المغربية خديجة بلغنامي

‎وحدتي بألف خير ‎وحدتي بخير…وأنا بألف خيربأحضانها أكون أنا بكل المقاييس‎كلما اختليتُ ارتقيت أكثر… أتامل الازدحام وهو يتساقط من أنامل الفراغ‎ …أشتهي وحدتي ويشتهيني فنجان قهوتي فأسُدُّ الباب في وجهِ…

اترك تعليقاً