بين السطور
محمد ضباشه
عضو اتحاد كتاب مصر 🇪🇬

بحبك يا فكرة يا بنت الذين
يا كاشفة البلاوي فى عتمة مدينة
وكل اللى ناوي يجرجر ما فينا
يخرم جيوبنا يدمع عينينا
سنقطع ديوله وديل اللى جابه
ونحرق بفكره ملامح كتابه
ويدن ما يدن ما نسمع هبابه
وصوت اللى عابه يجر السفينة

بحبك ك منجة بطعم الفنون
تأكل غلابة وتعزف قانون
بيسجن ديابة ويشبع بطون
ويلغى الكآبة ويغسل ظنون
ونلقى نخيلك بطول العيال
فتاكل بقوة تهز الجبال
وتفتح خزاين بطول المنال
وتهرب وتجري لقلب حنون

بحبك سنابل فى حضن الغيطان
بتطحن غناوي وتعجن كمان
رغيف المحبة وبسمة أمان
تكفي ولادك سنين الزمان
فتبدر جناين عقول الحقيقة
ترعرع مداين ضماير بريئة
وتشرق شموسك تنور قلوب
ويرجع مكانك لذات المكان

بحبك يا ومضة فى مخ الولاد
تغرق كراسي وتنجى البلاد
ما يغرف طبيخك أيادي العناد
وياكل رغيفك بارود الزناد
وترجع حمولك لبر الأمان
تفرق وتدى بطيبة وحنان
ونلغى رصيفك بقهر الليالي
ونزرع مكانه كرامة عباد

بحبك منارة حضارة وتاريخ
وحارة بتغلى فى حلة طبيخ
وعاركة وداير كلامها القبيح
لفتوى بتفتي لكثرة مديح
رئيس الإدارة وعزبة شطارة
وسرقة شكارة بتطفح طفيح
فحتما ادور وأضرب واعور
ولاد الذين فى عصر الصفيح