همسة عتاب
محمد ضباشه

طب فينا أيه ؟
نبكي عليه
أو حتى ليه راح نسألك
ياام المرايا مكسرة
تنظر لنا وتذلنا وتقول لنا
بلسان يطرطش فشخرة
أنا هنا غاوية الرتوش
فوق الوشوش
والأصل فيها ينعكس
صورة بشر
بالمختصر أو قد يجوز
عامية العنين!!!
الزير وقع طول انتظار
مالقاش فى بطنه يوم هنا
والهدمة تترقع وجع
مايهمهاش تفضل سنة
والحلة تشكى من مفيش
تغلي فى روحها دندنة
يمكن أنين !!
يمكن وجع !!
أو محتمل فخدة ضنى !!
قام الجدع يلحق نهار
مكتوب على وشه الشقا
ملقاش لقى
ولا حد فيه بذرة تقى
يستقبله
يفتح بيبان المنغلق
يمكن يشوف ساقية أمل
كان محتمل يحلم صحيح
قبل النهار ما يوبخه
ويعايرة أنه مالتقاش
طول الطريق دمع انفطر
على اللى مش لاقي المطر
يغسل برحمة جتته
ويعدى بيه فوق الجبل
اللى معرقل سكته
يفرش على أرض الهوى
قلبه اللى مش لاقى الدوى
للي بتغسل شعرها
فى ترعة الحب الجميل
قبل ما يغلى مهرها
ويسكنوها في قصور
جلاد بيجلد ضهرها
قام ارتجع
رجع وجع
وقال خلاص حظى كده
أشرب كاسات الصبر شوق
يمكن تفوق
أو في مراية عجزها
ألقانى فوق
ساكن على رمش القمر
أبريق بميه للوضوء
وعيونى ضوء هيدلها
تلحق صلاتي فى عصرها