قصيدة

سامحوني ماكنش قصدى

أيمن البكري

سامحوني ماكنش قصدي
الكلمه دي قولتها كام مره
ولمين وإمته
وياتري كانوا هما الغلطانين
ولا إنت
كام مره ب إيدين أقرب ماليك إندبحت
شيلت الهموم والحمول عانيت وإنجرحت

صعبان عليا الولد شايفه بيتكسر
تايه وسط الوشوش متبهدل ومتبحتر
فاشل لاكن إيه سبب فشله
مستحملوش مروا لما خلص عسله

عارف نفسي ترجع ذي زمان قاسي
وعلي أي حاجه بدوس
في زمانا الناس مبتحترمش
غير القوه والفلوس
ب أغلي تمن بيشتروا الندل والخسيس
أما الطيب المحترم أصبح رخيص

سامحوني علي كل دمعه
بكيتها في يوم عيوني
علي حلمي إلي إتهد وأصبح سراب
علي كل لحظة حزن وخوف وعذاب
ماكنتش أقدر أخد قرار
ولا كان ينفع أقدم إعتذار

مهما الناس عليك تقسي
إجمد هتقابل تاني لسه
هتشوف من داه كتير
من كتر ما شفت
مابقتش عارف أنا مين
أنا الطيب المسكين
وجوايا واحد شرير
أنا إل أحلامي بسيطه
وأنا إل كل أحلامي
بتطلع في الأخر وهم كبير

إوعي تيأس
إوعي تفتكر إنك مالكش لزمه
أو إن مفيش في الدنيا ليك مكان
ربنا خلقك لحكمه
وحالك إلي إنت فيه مهما كان
بردوا حكمه
حتي لو كنت فقير
مش لاقي لقمه
إحمد ربنا مش يمكن فقرك داه نعمه
إحمد ربنا وحالك إوعي تبكي عليه
مين عارف لو كنت غني
كان هيحصلك إيه

ولو في يوم غلط إعترف
إنك تقول الحق
هو داه معني الفضيله والشرف
إوعي تبقي ذي الكدابين المشهورين
إلي بيذيفوا الحقايق
من بره بيلمعوا ذي الدهب
ومن جوه صفيح مصدي
فتح عنيك علشان الحقيقه تشوف
لو غلط قولها من غير أي خوف
……سامحوني ماكنش قصدي