فى كل العهود
محمد ضباشه
عضو اتحاد كتاب مصر 🇪🇬

فى كل العهود
طلت وعود متزوقه
متلمعه ومتقمعه
لكن بينا وبينها سدود
والدود بيسرح جوه منها
والغطا براق
تشوفه يخطف عيونك
تحسه هم وراك
وأبواق الكلام خدام
حارسين جبال التيه
حوالين رجول المقام
واقفين يبوسوا إيديه
وملمعين الشاشات بسمة
وراسمة لصورة على الجدران
لنبى ما هوش نبى
بلا قبلة ولا قرآن
ولا حتى شبه المسيح
على موج المحبة يعوم
يا قوم فين الوعود
المسبوغة بسحر النوم
سنين طوال ننتظر
الوعد يطل خير
لا طل ولا هل ولا
إنتظاره له تبرير
يا سعادة جناب الخفير
الديب كل الغنمات
وانت فى سابع نومه
والكل بالعه سكات
يا امة الأموات أنا فينى
خر جبل الوعود
قطع شرايينى
لا دم نطق الشوق
ولا روح تلاقينى
فسيبونى تحت الركام
سراب الحال يغطينى