مش هعتذر

طعم الحنين م الروح بيتسرسب
والضوء بيشق ريق الصبح
يغسل م الندي توب الوجع
والقلب يخطف نبضته
من بين صهيل الأسئله
ويغالب النبض اللي مفروش بالحياه
مش مكتفي إنه يملس ع الجسد
ممدود كإنه لسه جوايا احتياج
بيدق تعاويذ الألم ف الروح
ياأيها الألم الذي لم ينته ذكره
يابسمة مخلوقة من عطره
تنهيدة البوح المباغت
بتتسكع بين ضلوع قلبي
وانتي بتسقيني الألم رشفات
لو كان شعورك بالندم
حبة آهات
وحاجات بتخنق ضحكتك
وقت الفرح
لو كات دموعك نبض ذات الأورده
بين خروشة روحك طنين نعسان
وقت انفلات العطر من جوف الندي
دبلت خدودك من شهيق الورد
ف الوجدان
وقت انكسار العطر ف الشرايين
وقتن متتنفس ضلوعك
تخنق النبض السجين
جوا براح القلب تقصف صرخته
وتمدي إيدك للفضا
والشمس فوق كتف النهار
خجلانه تبعت ضيها
تخطف شعاع العين
ضلاية الشجر اللي طارح
فوق كفوفك نور
يتشد من نبض الندي
حضن اغتصاب الريح
عصفور علي طرف اللقا بيدور
لكن جناحه جريح
يا أيها البنت اللي حبك
نبت ف قلبي نبضتين مرمر
ياعطر شهقة نبضتي السكر
يادمعه ساكنه جوا جفن الليل
وقتن مايسرح قلبي ويفكر
يامركبه شقت شواشي الموج
رجت رحيق البحر ف الشريان
عريان وبدفن شهقتي خوفي
واسجد مابين الرمش واتحايل
جوا مقام صدرك مريد صوفي
بين النهود يرقص ويتمايل
ويرش من ضي اللقا مواويل
يا أيها الصوت اللي سارح
جوا ف وريدي
يالحنها الطارح غناوي
فوق غصون عودي
لسه النهار جوايا بيفتح
والروح بتنزف طهرها أنهار
رغم احتضار الدهشه جوايا
رغم انكسار ضل الحقيقه
بين حنايا الإختيار
رافض أكون نفس المدبلج
والحوار زايف
……مع إني شايف
لكني رافض لعتذار
….مش هعتذر