كل شي ما افهمت.. شعبي

نص قرن مر
و عشر اسنين
من جنت طفل 
تعلمت من امي الحنين
اسنين العمر
تسابكَن و كبرنه
وعرفنه شويه نميز
الزين من الشين
بس ما عرفنه نميز
أكَلوب أليحبنه
يضحك بوجهنه
وبالظهر يغرز السجين
الدنيا مليانه قصص
وسوالفها ما تنفهم
وجاية يالتوّج نبتي
عن التجارب تسئلين
وحكـَ شيب الــ براسي
م افهمتها
وعمر يركض ركض
واتعدت اسنيني الستين
كل ما تكَول ذاك طيب
واله اصل
ينكَلب ويا الزمن
ويتغير
جنه انخلق من ذهب
مو من طين
يتغيير حتى على امه
وابوه
ويتكبر
وما يعرف ان الحياة ديّن
يا الي تسئليني
كل شي ما افهمت
دخلت من باب التواضع
واخرجت خالي الايدين
جربي تعيشي حياتج
بس لا تتكبري
واخذي العبر
من دروس غيرج
صدكَيني تنجحين
حسان ألأمين